जुम्ला । चिकित्सा शिक्षा सुधारको माग गर्दै जुम्लामा सत्याग्रह बसिरहेका डा. गोविन्द केसीलाई शनिबार मध्यरात कर्णाली स्वास्थ्य विज्ञान प्रतिष्ठान जुम्लामा सारिएको छ ।
डा. केसीको स्वास्थ्य अवस्था नाजुक बन्दै गएपछि मध्यरात कर्णाली स्वास्थ्य विज्ञान प्रतिष्ठानमा सारिएको हो । डा. केसीले अस्पताल भर्ना हुन नमानेपनि स्थानीय प्रशासनले सत्याग्रह बसिरहेको धर्मशालाबाट कर्णाली स्वास्थ्य विज्ञान प्रतिष्ठानमा सारेको छ ।
डा. केसीको छाती अत्यधिक दुख्न थालेको तथा श्वासप्रश्वासमा समस्या भइरहेको चिकित्सकको टोलीले जनाएको छ । त्यस्तै, पिसाबको मात्रा कम भइरहेको, रक्तचाप घटेको, मुटुको चाल अघिल्लो दिनभन्दा बढेको, कमजोरी, मांसपेशी बाउँडिने र रिँगटा लाग्ने समस्या देखिएको छ ।
स्लाइन चढाउनुपर्ने अवस्था आएको भएपनि डा. केसीले नमानेको र रगतमा चिनीको मात्रा न्यून भई शरीरका अंगहरूमा जटिल समस्या देखिन सक्ने चिकित्सकले जनाएका छन् । प्रतिष्ठानको टोलीले दैनिक तीनपटक स्वास्थ्य जाँच गर्दै आएको छ ।
कर्णाली स्वास्थ्य विज्ञान प्रतिष्ठान जुम्लाका डा. प्रविण गिरी, डा.नुपमंगल समाल र सविता थापासहितको टोलीले डा. केसीको स्वास्थ्य अवस्था नाजुक बन्दै गएको तत्काल अस्पतालमा सार्नुपर्ने सुझाव दिएको थियो ।