३७ पाठक संख्या
काठमाडौं । नेपाल एपीएफ क्लबले प्रधानमन्त्री कप महिला टि२० राष्ट्रिय प्रतियोगिता फाइनलमा कोशी प्रदेशलाई ११ रनले हराउँदै उपाधि जितेको छ । विजेता एपीएफले पाँच र उपविजेता कोशीले तीन लाख प्राप्त गर्नेछन् ।
जितको लागि १ सय १५ रनको विजयी लक्ष्य पछ्याएको कोशी प्रदेशले निर्धारित २० ओभरमा ४ विकेट गुमाउँदै १ सय ३ रन बनायो । कोशीकी कप्तान रुविना क्षेत्री बेलबासेले ५८ बलमा ७ चौका र १ छक्कासहित सर्वाधिक ६२ रन बनाएपनि जितको लागि पर्याप्त हुन सकेन ।
अन्तिम ६ बलमा जितको लागि १६ रन चाहिँदा करुणा भण्डारीको पहिलो बलमा स्टम्पिङ आउट गरेपछि जितको सम्भावना टाढिएको थियो ।
ओपनर अप्सरी बेगम ८ रनमा रन आउट भइन् । दोस्रो विकेटका लागि रुविना र काजोलले ६० रनको साझेदारी गरेका थिए । काजोल १७ औं ओभरको पहिलो बलमा सीताको बलमा २२ रनमा बोल्ड आउट भएकी थिइन् । त्यो बोल्ड आउट खेलको टर्निङ प्वाइन्ट बन्यो । एपीएफको जितमा करुणा भण्डारी र सीता रानामगरले १–१ विकेट लिइन् ।
त्यसअघि टियु क्रिकेट मैदानमा टस जितेर पहिला ब्याटिङ रोजेको एपीएफले निर्धारित २० ओभरमा ७ विकेट गुमाउँदै १ सय १४ रन बनाएको थियो । एपीएफकी इन्दु बर्माले ४७ बलमा ६ चौका र १ छक्कासहित सर्वाधिक ५३ रनको योगदान दिइन् ।
अप्सरी बेगमले अन्तिम ओभरमा ह्याट्रिक लिँदै कोशीलाई खेलमा फर्काएकी थिइन् । तर ब्याटिङ नचल्दा च्याम्पियन बन्न सकेन ।
अन्तिम ओभरको पहिलो बल इन्दु बर्मा नम्रता श्रेष्ठबाट प्वाइन्टमा क्याच आउट भइन् । दोस्रो बलमा नेरी स्टम्पिङ आउट भइन् । तेस्रो बलमा सोनु खड्कालाई बोल्ड गर्दै ह्याट्रिक लिइन् । यस प्रतियोगिता पहिलो ह्याट्रिक पनि थियो ।
मध्यगतिकी बलर एलिसा खडियाले चौथो ओभरको तेस्रो बलमा सीता रानामगरलाई १ रनमा बोल्ड आउट गरिन् । थोरै अघि बढेर ठूलो सर्ट खेल्ने धुनमा बोल्ड भएकी थिइन् ।
टियु एण्डबाट आएकी निशा शाहको १० औं ओभरको पहिलो बलमा ज्योति पाण्डे लङअनमा रुविना क्षेत्रीबाट २७ रनमा क्याच आउट भइन् । उनले ३० बलमा ३ चौका प्रहार गरिन् । रोमा थापा १४ र ममता चौधरी ३ रनमा आउट भइन् ।
कोशीकी अप्सरी बेगमले ४ ओभरमा २१ रन खर्चेर ३ विकेट लिइन् । एसिला खडियाले ४ ओभरमा १५ रन खर्चेर २ विकेट लिइन् । रुविना क्षेत्री र निशा शाहले १–१ विकेट लिइन् । लिग र क्वालिफायर दुबै खेलमा कोशी एपीएफसँग हारेको थियो ।
