बम्जनको घरमा सीआईबी : ३ करोड ३ लाख रुपैयाँ र १५ वटा मोबाइल बरामद, विदेशी मुद्रा गन्न बाँकी

ओकेखबर संवाददाता २५ पुष २०८०, बुधबार ११:२० मा प्रकाशित ( महिना अघि) ९९ पाठक संख्या

काठमाडौं । हत्या र यौनहिंसाका आरोपित रामबहादुर बम्जनको घरबाट प्रहरीले अहिलेसम्म तीन करोड ३ लाख नेपाली रूपैयाँ बरामद गरेको छ । आफूलाई ‘लिटल बुद्ध’ बताउने बम्जनको काठमाडौँको बूढानीलकण्ठस्थित घरबाट ३ करोड ३ लाख ७५ हजार रुपैयाँ बरामद भएको हो ।

केही मात्रामा विदेशी मुद्रा तथा १५ वटा मोबाइल, ल्यापटप र ३० वटाभन्दा बढी पेन ड्राइभ पनि बरामद भएको केन्द्रीय अनुसन्धान ब्युरो (सीआईबी)ले जानकारी दिएको छ । ‘अझै पनि सीआईबीको टोली उनको घरमै छ’, सीआईबी प्रमुख प्रहरी अतिरिक्त महानिरीक्षक (एआईजी) किरण बज्राचार्यले भनिन्, ‘अमेरिकन डलर, थाई, क्यानडियन लगायतका मुद्रा बरामद भएका छन् ।’

विदेशी मुद्रा बन्न बाँकी छ । ‘नेपाली रुपैयाँ गनेर सकिएको छ । अब बरामद भएको विदेशी पैसा गन्न बाँकी छ । डलर लगायत अरू पनि करेन्सी छन्,’ ब्युरो प्रमुख किरण ब्रजाचार्यले भनिन् ।

प्रहरीले मंगलबार बुढानीलकण्ठको हात्तिगौँडास्थित बमजनकै घरबाट उनलाई पक्राउ गरेको थियो । प्रहरी पुगेपछि भाग्नलाई उनी बरण्डाबाट हाम फालेका थिए । प्रहरीले केहीसमय अघिदेखि उनी काठमाडौंमा बस्दै आएको भन्ने सूचनाका आधारमा निगरानी बढाएको थियो ।

मंगलबार काठमाडौंको बुढानीलकण्ठबाट पक्राउ परेका उनलाई दिउँसो पत्रकार सम्मेलन गरेर सार्वजनिक गरिने छ ।

सार्वजनिक गरेपछि आरोपित बमजनलाई आजै सर्लाही पठाउने प्रहरीको तयारी छ । जिल्ला अदालत, सर्लाहीबाट उनीविरुद्ध पक्राउ पूर्जी जारी भएकाले पहिले त्यहाँ हाजिर गराउने तयारी गरिएको हो ।


सम्बन्धित खबरहरु