विश्वकै चर्चित र सरल गन्तव्य लाङटाङ (तस्विर)

ओकेखबर संवाददाता २६ कार्तिक २०८०, आईतवार १०:०९ मा प्रकाशित ( महिना अघि) ३२८ पाठक संख्या

काठमाडौं । असोज–कात्तिक महीना पदयात्रामा जाने उत्तम समय हो । नेपालमा धेरै पदयात्रा गर्ने गन्तव्यहरु छन् । जसमध्ये निकै सरल र उत्कृष्ठ गन्तव्य मध्येमा पर्छ लाङटाङ पदयात्रा । हिमाली क्षेत्रको पदयात्रामा लाङटाङ विश्वकै चर्चित गन्तव्यमध्येको हो । सिन्धुपाल्चोक, नुवाकोट र रसुवा जिल्लामा ६,४४० मिटरको उँचाइसम्म फैलिएको लाङटाङ हिमाली क्षेत्रको पहिलो राष्ट्रिय निकुञ्ज हो । ६६० वर्ग किलोमिटर क्षेत्रफल ओगट्ने लाङटाङ राष्ट्रिय निकुञ्जमा चर्चित हिम उपत्यका लाङटाङ, केन्जिन भ्यालीका साथै धार्मिक स्थल गोसाइँकुण्ड छ । यहाँ पदयात्राका क्रममा रेड पाण्डा, हिमचितुवा, जंगली कुकुर लगायतका जनावर पनि देख्न पाइने संयोग मिल्न सक्छ ।

 

कहाँबाट जाने ? कति लाग्छ खर्च ?

काठमाडौंबाट जाने हो भने माछापोखरीबाट सार्वजनिक यातायात वा निजी सवारीसाधनमा जान सकिन्छ । माछापोखरीमा बिहान ६ बजेदेखि ९ बजेसम्म सार्वजनिक बस पाइन्छ । बालाजु, कलंकी, थानकोट, गल्छी, नुवाकोट धुन्चेहुँदै ६–७ घण्टामा स्याफ्रुबेँसी पुगिन्छ । त्यसपछि सुरु हुन्छ पैदलयात्रा । स्याफ्रुबेँसीबाट ३ घण्टाको पैदल यात्रापछि ब्याम्बोमा बास बस्न पुगिन्छ । तर, समय रहेमा लामा होटल वा रिइभरसाइडमा गएर बास बस्दा उपयुक्त हुन्छ ।

भोलिपल्ट कहिले उकाली कहिले ओराली गर्दै लाङटाङ वा क्यान्जिङ गुम्बा पुगिन्छ । यात्रामा लाङटाङ खोलाले साथ छोड्दैन । पहाडको चेपबाट झरिरहेका झरना, चरा चुरुङ्गीको चिरबिरचिरबिर आवाजले मन शान्त बनाउँछ । यसरी अर्को दिन बिहानै क्यान्जिङ उपत्यकाबाट क्याजिङ री जान सहज हुन्छ । कतिपय भने क्यान्जिङ पुगेपछि यलापिक अथवा सेर्गोेरीतर्फ जान्छन् ।

क्यान्जिङ गुम्बाबाट क्यान्जिङ री–१ साढे १ घण्टा र क्यान्जिङ–२ साढे २ घण्टामा पुगिन्छ । क्यान्जिङ रीबाट फर्किएर लाङटाङ आएर बास बस्दा राम्रो हुन्छ । र, लाङटाङबाट स्याफ्रुबेँसी आएर सवारीसाधनमा आफ्नो घर फर्किन सहज हुन्छ ।

लाङटाङ ट्रेल राम्रो र सहज भएकाले ५ दिनमा पूरा गर्न सकिन्छ । लाङटाङ ट्रेकिङका लागि कति खर्च लाग्ल भन्ने प्रश्न धेरैलाई लाग्न सक्छ । ५ दिनका लागि बिहानबेलुकाको दालभात खान र बस्नका लागि १५ हजार भए पुग्छ । र, बाटोमा खानका लागि काजु, किसमिस, ओखर, बदम, बिस्कुट, क्याटबरी चक्लेट भने आफूले छुट्टै लैजानुपर्छ ।

तस्विरमा हेरौं मनमोहक लाङटाङ

  

 


सम्बन्धित खबरहरु