४४४ पाठक संख्या
मुम्बई(दैनिक भास्कर)– बलिउड अभिनेता सुशान्त सिंह राजपूतको आज पहिलो वार्षिकी हो । कोठामा मृत भेटिएका सुशान्तको मृत्युको विषयमा गरिएको अनुसन्धानको टुंगो अझै पनि लाग्न सकेको छैन ।
बलिउडमा सुशान्तको माग उच्च थियो । फिल्मका व्यापार विश्लेषकहरु यो कुराको पुष्टि गर्छन् । निधनअघि सुशान्तलाई धेरै फिल्मबाट अफर आएको थियो । तर रोचक कुरा के छ भने सुशान्तलाई अभिनयको प्रस्ताव गरिएका १० वटा फिल्म कलाकारको अभावकै कारण निर्माण हुन सकेका छैनन् ।
उनको निधनको एकदिन अघिमात्र सुशान्त रमेश तौरानीसँग एक फिल्मको विषयमा कुराकानी गरिरहेका थिए । यो फिल्मलाई निखिल आडवाणीले निर्माण गर्ने तयारीमा थिए । सुशान्तको अभावमा एक्सन थ्रिलर यो फिल्ममा अहिले को कलाकार फाइनल भयो भन्ने केही खुलेको छैन ।
निर्देशक रुमी जाफरी पनि सुशान्तलाई लिएर एक्सन थ्रिलर फिल्म बनाउन चाहन्थे । वाशु भगनानीले निर्माण गर्ने तयारी गरिएको फिल्ममा सुशान्तकी प्रेमिका रिया चक्रवर्तीले पनि अभिनय गर्ने कुरा थियो । तर आकस्मिक रुपमा सुशान्तको निधन भएपछि यो फिल्म पनि रोकिएको ।
उता सन्दीप सिंहले सुशान्तका साथ फिल्म ‘बन्दे मातरम’ घोषणा गरेका थिए । त्यस्तै शेखर कपूरको फिल्म ‘पानी’मा पनि सुशान्तको कुराकानी चलिरहेको थियो । व्यापार विश्लेषकहरुका अनुसार फिल्म ‘धोनी’को बायोपिक निर्माता कमल जैनले सुशान्त प्रमुख भूमिकामा अभिनय गराउन एक दक्षिण भारतीय फिल्मको रिमेक अधिकार किनेका थिए ।
त्यस्तै विक्रम मेहताले सुशान्तलाई फिल्म ‘राइफलमेन’मा लिने तयारी गरेका थिए । हालसम्म यो फिल्ममा अगाडिको विकासबारे केही खुलेको छैन ।
यसबाहेक कुमार मंगत पाठक अभिनेता सुशान्त र कार्तिक आर्यनलाई लिएर एक फिल्म बनाउने योजनामा थिए । तर यो फिल्म पनि हालसम्म फ्लोरमा आएको छैन ।
रसूल पुकट्टी पनि सुशान्तलाई लिएर एक प्रेमकथाको फिल्म बनाउन चाहन्थे । रसूल निकटका अनुसार हालसम्म फिल्ममा सुशान्तको स्थानमा कोही कलाकार छनोट भएका छैनन् । सुशान्तलाई नै लिएर आनन्द गान्धी फिल्म ‘इमरजेन्स’ बनाउन चाहन्थे । उनले यो फिल्मसँगै अन्य दुई फिल्ममा पनि सुशान्तलाई जोड्न चाहन्थे ।
व्यापार विश्लेषक अतुल मोहन सुशान्त दुई अभिनेता वरुण धवन र सिद्धार्थ मल्होत्राको ‘स्टार पावर लिग’मा रहेको दाबी गर्छन् । ‘मलाई लाग्छ सुशान्तले आफ्नो करियरमा ९ फिल्ममा अभिनय गरे । उनी निकै चुजी थिए । यी नौ फिल्ममध्ये ‘छिछोरे’ र ‘धोनी’ले सय करोड माथिको व्यापार गर्यो । उनले अभिनय गरेको फिल्म ‘पीके’ले ३ सय करोड माथिको व्यापार गर्यो । यसको श्रेय आमिर खानलाई जान्छ’, उनी भन्छन् ।
