राहत वितरणमा प्रहरीमाथि आक्रमण, चार पक्राउ

ओकेखबर संवाददाता १२ बैशाख २०७७, शुक्रबार २१:१८ मा प्रकाशित ( साल अघि) ४०२ पाठक संख्या

परासी । प्रहरीमाथि आक्रमण गरेको आरोपमा नवलपरासीमा प्रहरीले चार जनालाई पक्राउ गरेको छ । रामग्राम नगरपालिका–१७ देवगावमा राहत वितरणका विषयलाई लिएर स्थानीयवासी र प्रहरीबीच झडप भएको थियो । झडपमा एक प्रहरी सहायक निरीक्षक घाइते भएका थिए ।

राहतमा विभेद गरेको भन्दै स्थानीयवासीले वडा कार्यालयमा तालाबन्दी गरेपछि ताला खोल्न पुगेका प्रहरीसँग स्थानीयवासीको झडप भएको हो ।

घटनामा संलग्न रहेको आरोपमा एक महिलासहित चार जनालाई नियन्त्रणमा लिएर अनुसन्धान गरिएको जनाइएको छ । उक्त वडामा राहत वितरण भइरहेका अवस्थामा एक समूह आएर हुनेखानेलाई पनि राहत दिनुपर्ने भन्दै विवाद निकालेर वडा कार्यालयमा तालाबन्दी गरेको वडाध्यक्ष जीतबहादुर गोसाईँले जानकारी दिए। तालाबन्दी खोल्न पुगेको प्रहरीसँग समूहमा रहेका स्थानीयवासीले आक्रमण गरेको उहाँले बताउनुभयो । उक्त वडाका २०० घरधुरीका लागि राहत वितरण गरिएको थियो ।


सम्बन्धित खबरहरु