३३४ पाठक संख्या
काठमाडौं । लक डाउनका कारण काठमाडौंमा रहेकालाई सरकारले शुक्रबार र शनिबार उपत्यका बाहिर जान दिने निर्णय केही समयमै रद्द भएको छ ।
सरकारले कोरोना भाइरसको सम्भावित जोखिमलाई न्युनिकरण गर्न भन्दै लागु गरेको लकडाउनका कारण अलपत्र परेकाहरुलाई उपत्यका बाहिर जान दिने निर्णयबाट सरकार पछि हटेको हो ।
त्यसो त काठमाडौंबाट बाहिर पठाउने समाचार सार्वजनिक भएपछि विभिन्न स्थानीय तहहरूले आलोचना गरेका थिए। सरकारले केही दिनअघि मात्रै एउटा स्थानीय तहबाट अर्को स्थानीय तहमा जान नदिने निर्णय गरेको थियो।
प्रदेश ५ का मुख्यमन्त्री शंकर पोखरेलले त सामाजिक सञ्जालमै त्यस्तो निर्णय भएको भए लक डाउनको अर्थ नहुने भन्दै विरोध गरेका थिए।
उपप्रधान तथा रक्षामन्त्री ईश्वर पोखरेलले सरोकारबाला मन्त्रीहरुलाई बोलाएर उपत्यकामा रोकिएकाहरुलाई भोलि र पर्सि बाहिर जान दिन निर्देशन दिए । कसरी जान दिने भन्ने गृहकार्य गर्न गृह सचिवलाई भनिएको थियो ।
लकडाउन वैशाख ३ सम्म लम्बिएपछि मानिसहरु हिँडेर समेत घर जान थालेका छन् । त्यसलाई हेरेर सरकारले उपत्यकामा अलपत्र परेकाहरुलाई उपत्यका बाहिर जान दिने गृहकार्य गरेको थियो ।
