आज: 

कोरोना भाइरसको सन्त्रास : चैत ५ गतेभित्र परीक्षा लिन विद्यालयहरुलाई शिक्षा मन्‍त्रालयको निर्देशन

ओके खबर २० फाल्गुन २०७६, मंगलवार १७:५३ मा प्रकाशित ( साल अघि) ५७६ पाठक संख्या

काठमाडौं । आगामी चैत ५ गतेभित्र कक्षा १ देखि ९ सम्मको परीक्षा लिन शिक्षा, विज्ञान तथा प्रविधि मन्त्रालयले विद्यालयहरुलाई निर्देशन दिएको छ ।

कोरोना भाइरस (कोभिड–१९)को सम्भावित संक्रणको त्रासका कारण मन्त्रालयले विद्यालयलाई सतर्कता अपनाउन निर्देशन दिएको हो ।

मन्त्रालयका सचिव महेशप्रसाद दाहालले मंगलबार निजी तथा आवासीय विद्यालय अर्गनाइजेसन (प्याब्सन) र नेसनल प्याब्सनको प्रतिनिधि तथा सरोकार पक्षलाई बोलाएर निर्देशन जारी गरेको हो ।

मन्त्रालयले आगामी चैत ५ गतेभित्र कक्षा १ देखि ९ सम्मको परीक्षा लिन भनेको छ । सामूहिक भेला, सेमिनार, गोष्ठीलगायत कार्यक्रम नगर्न भनेको छ ।

आगामी चैत ६ गतेबाट १५ गतेसम्म विद्यालय शिक्षा परीक्षा ९एसईई० हुने निर्धारित तालिका रहेको छ । एसईई परीक्षा केन्द्रीय सरकारमातहत सञ्चालन हुने गरेको छ ।

त्यसैगरी स्थानीय सरकार (पालिका) मातहतमा कक्षा ५ र ८ को जिल्लास्तरीय परीक्षा संचालन हुने गर्दछ । उक्त परीक्षामा पालिकाले निर्माण गरेको प्रश्नपत्रको आधारमा लिइन्छ । त्यस निम्ति परीक्षा केन्द्र निर्धारण नगरी आ–आफ्नो विद्यालयमा लिने व्यवस्था गर्नसमेत मन्त्रालयले भनेको छ ।

साथै सरकारले कोरोना भाइरसको संक्रमण र सन्त्रास बढ्दै गएको भन्दै विद्यालयमा सभा, समारोह र वार्षिक उत्सव नगर्न पनि आग्रह गरेको छ ।


सम्बन्धित खबरहरु