११६ पाठक संख्या
काठमाडौं । बुद्दनगरस्थित केएमसी स्कुलमा मृत फेला परेकी रमा रायमाझीको शव उठाउन परिवार सहमत भएका छन् । शानिवार साँझ उनी स्कुलको होस्टलमा मृत भेटिएकी थिइन् । काभ्रे घर भएकी २१ वर्षीया रमाको शव उठाउन परिवारसँग सहमती भएको जिल्ला प्रहरी परिसर काठमाडौंका एसपी दिनेशराज मैनालीले बताए ।
सहमति पश्चात शव पोष्टमार्टमाका लागि त्रिवि शिक्षण अस्पतालमा पठाउन लागिएको छ । विद्यालय पीडितका परिवारलाई ८ लाख क्षतिपूर्ति दिन सहमत भएको छ । होस्टलको डबल टेकर खाटमा झुण्डिएको अवस्थामा रमाको शव भेटिएको थियो । रमाको हत्या आशंका गरेर छानविन र क्षतिपूर्तिको माग गर्दै आफन्तले शव उठाउन रोकेका थिए ।
घटनाबारे उपत्यका अपराध अनुसन्धान कार्यालय र जिल्ला प्रहरी परिसर काठमाडौंले अनुसन्धान शुरु गरेका छन् । आइतबार दिनभर स्कुल अगाडि आफन्तले प्रदर्शन गरेका थिए । शनिवार अबेरसम्म रमा घर नआएपछि उनकी बहिनी गोमा स्कुलमा गएकी थिइन् । गोमाले नै दिदी झुण्डेको देखेको बताइएको छ । स्कुल परिसरमा भेटिएका मृतकका दाई नाता पर्ने निर्मल रायमाझीले हत्या आशंका गर्दै घटनाको अनुसन्धान र छानविन गर्न माग गरेका छन् ।
