३१७ पाठक संख्या
विराटनगर। तस्करी गरी अवैध रूपमा भारतर्फ लैजाँदै गरेको २३ तोला सुनसहित सशस्त्र प्रहरीले १ जनालाई पक्राउ गरेको छ ।
विराटनगर १७ घर भएका श्यामल सेन गुप्तालाई प्रहरीले सीमाक्षेत्रबाट २ सय ६७ ग्राम (२३ तोला) सुनसहित पक्राउ गरेको हो । पक्राउ परेका गुप्ता भरिया रहेको खुलेको छ ।
बरामद गरेको सुनको मूल्य २७ लाख ६७ हजार रुपैयाँ रहेको जनाइएको छ । प्रहरीले उनको साथबाट नेपाली रुपैयाँ ५ हजार, साइकल र मोबाइलसमेत बरामद गरेको छ ।
दूध पुर्याउन जान लागेको बहानामा भारतर्फ लैजाने क्रममा २ सय ६७ ग्राम सुन बरामद गरेको सशस्त्र प्रहरी मोरङका प्रमुख एसपी तीर्थ पौडेलले जानकारी दिए ।
सीमासँग जोडिएको मोरङको विराटनगरस्थित दरैयाबस्ती हुँदै भारततर्फ लैजाने क्रममा सशस्त्र प्रहरी बलको बीओपी बखरी पोष्टले अवैध सुन बरामद गरेको हो । प्रहरीले बरामद गरेको सुनसहित गुप्तालाई विराटनगर भन्सार कार्यालयमा बुझाउने जनाएको छ ।
