३४ पाठक संख्या
काठमाडौं । हाल देशभर मनसुनी वायुको प्रभाव रहेको छ । बिहान साधरणतया देशभर बदली रही मधेश, बागमती, गण्डकी प्रदेशका केही र कोशी प्रदेशका थोरै स्थानमा हल्कादेखि मध्यम वर्षा भइरहेको छ ।
दिउँसो देशभर आंशिकदेखि साधरणतया बदली रहने जल तथा मौसम विज्ञान विभागले जनाएको छ । बागमती, गण्डकी र लुम्बिनी प्रदेशका केही तथा मधेश, कर्णाली र सुदूरपश्चिम प्रदेशका थोरै स्थानमा मेघ गर्जन/चट्याङसहित हल्कादेखि मध्यम वर्षाको सम्भावना छ । गण्डकी प्रदेशको एक/दुई स्थानमा भने भारी वर्षाको सम्भावना रहेको छ।
राति देशभर आंशिकदेखि साधरणतया बदली रहनेछ ।
बागमती, गण्डकी, कर्णाली र सुदूरपश्चिम प्रदेशका केही स्थान तथा बाँकी प्रदेशका थोरै स्थानमा मेघ गर्जन/चट्याङसहित हल्कादेखि मध्यम वर्षाको सम्भावना रहेको छ ।
बागमती, गण्डकी र सुदूरपश्चिम प्रदेशका एक/दुई स्थानमा भारी वर्षाको सम्भावना रहेको विभागले जनाएको छ । ती क्षेत्रमा बाढी, पहिरो तथा भू–क्षय जस्ता प्रकोपको जोखिम रहेकाले त्यसबाट जोगिन आवश्यक सतर्कता अपनाउन पनि विभागले अनुरोध गरेको छ ।
