७२ पाठक संख्या
अन्नपूर्ण सेन्चुरी पर्यटन समितिद्वारा आयोजना गर्दै आइएको उक्त म्याराथन अन्नपूर्ण आधार शिविर (४१३० मिटर) बाट शुरू भई माछापुच्छ्रे आधार शिविर, देउराली, दोभान, बम्बो, छोम्रोङ, किम्रोङखोला, उरी हुँदै घान्द्रुकस्थित मेश्राम वराह माविको खेलमैदानमा सम्पन्न हुने छ ।
म्याराथनको दूरी ४२.१९५ किलोमिटर रहेको र यस म्याराथनलाई अन्तर्राष्ट्रियस्तरमा पुर्याउने लक्ष्यसहित अल्टिमेट एडभेन्चर नेपालले प्राविधिक व्यवस्थापन गर्ने समितिको अध्यक्ष एवं म्याराथनका संयोजक ललित गुरुङले जानकारी दिए ।
म्याराथनमा पुरुष र महिलातर्फ छुट्टाछुट्टै प्रतिस्पर्धा हुने छ । हालसम्म १० विदेशी धावकसहित ६० जनाले नाम दर्ता गराइसकेको जनाइएको छ । दर्ता शुल्क महिला तथा पुरुष दुवैका लागि रु सात हजार तोकिएको छ । प्रतियोगितामा प्रथम, द्वितीय र तृतीय हुने धावकले क्रमशः एक लाख ५० हजार, एक लाख र ७५ हजार पुरस्कार प्राप्त गर्नेछन् ।
यसपटक म्याराथनमा थप विशेष पुरस्कार पनि घोषणा गरिएको छ । अन्नपूर्ण गाउँपालिकाभित्रको स्थायी ठेगाना भएका सहभागीमध्ये प्रथम हुने धावकलाई विशेष पुरस्कार प्रदान गरिने छभने गण्डकी प्रदेशका धावकमध्ये प्रथम हुनेले पनि विशेष पुरस्कार पाउने छन् । महिलातर्फ लगातार तीनपटक म्याराथनमा सहभागिता जनाउने धावकलाई प्रोत्साहनस्वरूप विशेष पुरस्कार दिइने आयोजकले जानकारी दिएको छ ।
म्याराथनकै अवसरमा ‘अन्नपूर्ण पत्रकारिता पुरस्कार–२०८२’ प्रदान गरिने छ । कार्यक्रम सम्पन्न गर्न करिब रु ३८ लाख लाग्ने अनुमान गरिएको छ । अन्नपूर्ण गाउँपालिका, नेपाल पर्यटन बोर्ड, पोखरा महानगरपालिका, एक्याप, गण्डकी प्रदेश खेलकुद परिषद्, विभिन्न पर्यटन समिति तथा निजी क्षेत्रका सङ्घसंस्थाबाट सहयोग जुटाइने बताइएको छ ।
कार्यक्रम व्यवस्थापनका लागि ५०१ सदस्यीय मूल समिति र १३ वटा उपसमिति गठन गरिएको छ । हालसम्म ९० प्रतिशत तयारी पूरा भइसकेको संयोजक गुरुङले जानकारी दिए ।
