जाजरकोट भूकम्प : खोज तथा उद्धार जारी

भूकम्प प्रभावित क्षेत्र जाजरकोट र रुकुमपश्चिममा खटिएको सेनाको फौजले अन्य सुरक्षा निकाय र स्थानीयको सहकार्यमा खोज तथा उद्धार जारी राखेको नेपाली सेनाले जनाएको छ। नेपाली सेनाका प्रवक्ता कृष्णप्रसाद भण्डारीले परिचालित फौजले मृतकको शव तथा घाइतेहरूको उद्धार गरी अस्पताल पठाउने काम गरिरहेको जानकारी दिए।

गएराति ११:४७ बजे जाजरकोटको बारेकोट गाउँपालिका-१, रामीडाँडा केन्द्रबिन्दु बनाएर छ दशमलव चार रेक्टर स्केलको भूकम्प गएलगत्तै प्रभावित इलाकामा नेपाली सेनाको खोज तथा उद्धार टोली परिचालन भएको प्रवक्ता भण्डारीको भनाइ छ। काठमाडौं, सुर्खेत र नेपालगन्जमा डाक्टर र स्वास्थ्य सामग्रीसहितको टोली थप उद्धारका लागि ‘स्ट्यान्ड बाई’ राखिएको र घाइतेको थप उपचारका लागि सैनिक अस्पताल नेपालगन्ज र वीरेन्द्र अस्पताल छाउनीमा डाक्टरको टोली तयारी अवस्थामा राखिएको सेनाले जनाएको छ।

भूकम्प प्रभावित क्षेत्रमा खोज तथा उद्धारका लागि एनए-०५७ एमआई हेलिकोप्टरमार्फत काठमाडौंबाट चौरजहारीमा तीनजना डाक्टरसहित १६ जना, एनए-०१६०६४ स्काई ट्रकमार्फत काठमाडौंबाट चौरजहारीमा १६ जना, एनए-०६१ बेल हेलिकोप्टरमार्फत सुर्खेत लामिडाँडामा तीनजना र एनए-०३८ एमआई हेलिकोप्टरमार्फत काठमाडौंबाट चौरजहारीमा २६ जना मेडिकल टिमसहितका फौज परिचालन गरिएको नेपाली सेनाले जनाएको छ।