७६६ पाठक संख्या
मेरा आँखा अगाडी तम्सिएका निर्दोष खुकुरीहरु मलाई चियाइरहेका थिए ,
डेक्चीमा बसालेका तातो पानीको बाफले मेरो विश्वासलाई पखालीरहेको थियो ,
बादल ठोक्किएर निस्कने ध्वनि जस्तै गरि मेरो मन ती खुकुरीका धारमा ठोक्किएर निस्कने आवाज ती कुरिरहेका थिए ,
अनि निर्मल निर्दोष मेरा यी आँखा मा आँखा जुधाई सोधिरहेका थिए , अन्तिम इच्छा के छ ?
कृपया मेरो श्वासमा खुकुरीको धार नतेर्साइदिनु होला !
मेरा आँखा अगाडी भक्भक् उम्लिरहेका ती पानी जस्तै मेरा आँखा भित्र उम्लिरहेका थिए मेरा डर पनि ,
बेसारको पहेँला रङ्ग मेरो आँखाले काला देखिरहेका थिए ,
खुसिले चिच्याइरहेका ती केटाकेटीसँगै मेरो कानले सुनिरहेका थिए मेरा सन्तानका चित्कार पनि ,
राता ताता मेरा यी रगत थाप्न ल्याइएका बाटा पनि कामिरहेका थिए ,
धर्मका बारेमा फुक्ने पण्डित बाजे पनि मेरा यी रगत चाट्न ठाडो घाँटी पारिरहेका थिए ,
अनि मलाई पाँच वर्ष मायाको नाममा डाम लगाउने साउ आएर सोधिरहेका थिए ” अन्तिम इच्छा के छ ?”
कृपया मेरो श्वासमा खुकुरीको धार नतेर्साइदिनु होला !
उदाउँदै गरेको सूर्यको प्रकाशले मलाई घेरिरहेको थियो ,
मेरा चेहेरामा बगेका काला डरले मलाई पोलिरहेको थियो ,
उडिरहेको हावा अडिएर मलाई एकोहोरो हेरिरहेको थियो ,
चारैतिर लडिरहेका ती जीवित लास गनाएर मेरो श्वास अड्किरहेको थियो ,
अनि ती दुर्गन्ध मलाई आएर सोधीरहेको थियो , ” अन्तिम इच्छा के छ ? ”
कृपया मेरो श्वासमा खुकुरीको धार नतेर्साइदिनु होला !
आस्थाका सटर भित्र मलाई काट्न किंवदन्तीका पाना पल्टिदै थिए ,
सुरुप्प थुक निल्दा आत्तिएका अङ्गहरु झसङ्ग पर्दै थिए ,
कामिरहेका बाटासँगै यी फाट्दै गएका मन पनि तनसँग काम्दै थिए ,
डरले मूर्छित् श्वास रुद्रघण्डीको छेउमा गाठो पर्दै थिए ,
आगोको ज्वाला दन्दनि आँखा अगाडी बल्दा सपनीमा खरानीका धुला उड्दै थिए ,
अनि बिपनी मलाई आएर सोधिरहेको थियो , ” अन्तिम इच्छा के छ ? ” ।
कृपया मेरो श्वासमा खुकुरीको धार नतेर्साइदिनु होला !
साउको मनले तानेको अहंकार विणीको धुँवाले मेरो फोक्सो सडिरहेको थियो ,
मेरा हात खुट्टा समाएर राख्दा जीवनले अन्तिम श्वास फेरिरहेको थियो ,
मात्र एउटा प्रश्नवाचक चिह्न लागिरहेको थियो ,
जब यी श्वास छिन्न लागिरहेको थियो ,
” मलाई अन्तिम इच्छा किन सोधियो ? ”
रचनाकार निश्चल आचार्य साहित्य क्षेत्रमा कलम चलाउछन् ।
